Casu David Blanco. Queremos saber la verdá.

5 de marzu de 2013 DE 2013 • Glayiu

Fae más de cuatro años de la muerte de David Blanco na comisaría de Xixón. A David lu detuvo la Policía Local y lluéu d’una reconocencia médica enviáronlu a los calabozos de la Policía Nacional de los que salió ensin vida.

David Blanco morrió na comisaría del Natahoyo de Xixón el 26 d’avientu de 2008. David, de 22 años, foi deteníu cuándo presuntamente intentaba aportar a una autoescuela del mesmu barriu a efectuar un robu. En toos estos años, nun se depuraron responsabilidaes nin buscaron culpables del so fallecimientu.
Tres la so muerte la so familia empecipió una llarga serie de reivindicaciones y lluches a nivel personal, qu’abandonaron dos años dempués de los fechos, el 26 de diembre de 2010 tres la última concentración na vía pública. Esta decisión foi tomada influyida directamente por diversos factores, ente los cualos fueron más significativos la medrana, los siguimientos policiales y el desengañu sufiertu con diversos sectores pertenecientes a los movimientos sociales que-yos defraudaron fondamente.

A día de güei la causa xudicial ta archivada provisionalmente a la espera de pruebes. Fechu del cuál los sos familiares cercanos enteráronse por aciu d’un artículu qu’apaeció nel diariu El comerciu de Xixón. Tantu enantes de morrer David, como nos díes siguientes a la so muerte, el procesu llegal y el protocolu policial a siguir nesti tipu de situaciones tuvo llenu d’irregularidaes y d’interesaes neglixencies. Les contradicciones ente la versión de los fechos qu’apaez na causa juidicial, l’informe de la autopsia y l’informe de Tóxicos de Madrid siguen ensin esclariase. N’ún de los períodicos más representativos de la prensa local llegaron a variar en cinco ocasiones les causes de la muerte de David nun plazu inferior a tres selmanes.
A la familia de David nunca llegaron a devolve-y la ropa qu’él llevaba puesta nel momentu de la detención, nin la mayoría de los oxetos personales que’l portaba aquel día. Nel so sangre apaecieron restos de Metasedyn 30, una melecina narcoléptico recetada a enfermos drogodependientes de sustancies como la heroína, na so dosis más elevada. Esta melecina nun puede suministrase ensin consultar l’historial médicu del paciente, yá que nel casu de que tea tomando dalgún tipu de deriváu de la familia de les Benzodiazepinas l’amiestu puede provocar una reacción alérxica que produz la muerte. David nun yera consumidor habitual de diches sustances, de fechu esiste un documentu qu’acredita que toles pruebes que-y efectuaron en busca de restos de cocaína y heroína dieron negativu. David taba en tratamientu psiquiátricu porque sufría un cuadru d’ansiedá, pol cuál habíen-y recetado Diazepam, un ansiolíticu deriváu de la 1,4-benzodiazepina.

La versión oficial diz qu’el Metasedyn recetáron-ylu antes de llevalu a comisiaría nun ambulatoriu del mesmu barriu. Tantu nel casu de que la persona que lo recetó comprobara l’historial médicu de David como nel que nun lo fixera, la neglixencia médica ye abrumadora. Otra irregularidá reseñable ye que la mesma persona qu’efectuó la autopsía foi la que realizó en llevantamientu del cadaver, algo qu’a nivel llegal ye totalmente improcendente. Esta ye sola una pequeña amuesa de les irregularidaes cometíes. A día de güei, a menos d’un años por que’l delitu prescriba, la intención de la familia ye da-y el mayor espardimientu al casu, ya intentar reabrir pola vía civil, pa intentar esclariar d’una vegada por toes los fechos ya intentar qu’esto sirva por que nun se vuelvan producir muertes d’esti tipu.

Esti xueves 7 de marzu va cellebrase un conciertu solidariu nel CSOA La Madreña d’Uviéu pa intentar arreglar los gastos económicos que deriven de la campaña pola reapertura del casu de la muerte de David, la velada tara amenizada peles siguiente bandes: Punko!uk (Benidorm), Antihigienikos (Xixón), Alvarito (Cantautor, La Pola), Zigua (Xixón) ya Infección (Occidente asturianu).

JPEG - 124.5 KB