Pola llibertá d’Isma y Miguel

6 de xunu de 2014 DE 2014 • Glayiu

Ante un fuerte dispositivu policial, un grupu de solidarixs concentraronse na tarde d’ayeri delantre de la see del PP d’Uviéu, pa reclamar la inmediata puesta en llibertá de los compañeros Isma y Miguel. "Son presos políticos que sirven al Gobiernu pa xustificar la Llei de Seguridá Ciudadana", afirmaba unu de los voceros de la Plataforma.

Tán en prisión preventiva y el casu sigue abiertu ensin que pel momento se sepa cuándo van ser puestos en llibertá o la fecha del xuiciu. Miguel Milián tien 21 años
ya Ismael Nachit namás 18.

Miguel foi deteníu’l mesmu día 22 dempués de la manifestación de les Marches de la Dignidá y los enfrentamientos que se producieron al términu d’ésta, que dexaron más
de cien manifestantes mancaos, ente los qu’hai un mozu que perdió un güeyu y otru
un testículu. La prueba cola que lu unviaron a preventiva ye qu’un axente de la policía secreta oyó-y dicir a los sos amigos que-y tiró una piedra na tiesta cuando taba nel
suelu, refiriéndose a un uniformado. Y Isma foi arrestáu una selmana más tarde na denominada Operación Puma 70, na que la Brigada Provincial d’Información diba a por otros once mozos a les sos cases y puestos de trabayu. Los abogaos aseguren qu’en nengún de dambos casos hai pruebes abondes que xustifiquen l’ingresu en prisión, amás de que al ser tan xovenes, con enraigo familiar y, nel casu de Isma, un empléu, nun hai tampoco un riesgu de fuga que la xustifique.

El 22-M una Unidá d’Intervención Policial "cargó contra’l gruesu de la concentración
sobre les 20.40 nuna Plaza de Colón atarraquitada de xente, qu’inda esperaba a rematar los actos", aseguraron los voceros de les plataformes lleendo un comunicáu. Por ello, esixeron la puesta en llibertá y l’absolución de tolos deteníos aquel día. Y recordaron, coles mesmes, que nengún axente foi imputáu magar haber un gran númberu de manifestantes mancaos, de lo que responsabilizaron directamente a la Delegación de Gobiernu de Madrid, que dirixe Cristina Cifuentes, y a los mandos policiales, que tamién fueron criticaos polos sos propios subordinaos.

"Miguel ta aguantando con entereza, magar les sos 21 años. Ta activu y conoz el sofitu que ta teniendo" "Isma ta bien, fuerte, sabe que cunta col sofitu de los sos amigos y la so familia", comentó unu de los sos compañeros y voceru de la plataforma creada pa pidir la so llibertá. Sicasí, quixo remarcar que tres el so ingresu en prisión perdió l’empléu que tenía, "nun momentu nel que tener trabayu ye un privilexu", lo que fixo que "la so vida camudara pa siempres".

"Tamos intentando que salgan, plantegemos un recursu de reforma que foi tornáu,
y tamos a la espera de que l’Audiencia Provincial pronúnciese sobre otru recursu d’apelación", aseguraba la selmana pasada l’abogáu de Isma, Erlantz Ibarrondo.