Mariu Arbesú: "Si supiese por qué nun hai xunidá na izquierda soberanista diba ser abondo más fácil resolver esi problema"

28 de xineru de 2013 DE 2013 • Glayiu

El movimientu políticu Conceyu Abiertu vien de cellebrar una Coordinación Nacional na qu’apostaron por afondar na llucha escontra’l fracking n’Asturies y afitaron les llínees d’una campaña pola defensa de los conceyos asturianos, agora que suenen aires de recentralización. Falamos col so Coordinador Nacional, Mariu Arbesú, pa que mos cuente más afondo en qué consiste la so alternativa política.

"Lo que tamos intentando ye facer un proyectu políticu que dende la base, a través de la participación de la xente afale la democracia participativa dende los conceyos, l’ámbitu fundamental nel que nos queremos mover por ser lo más cercano a los ciudadanos, y ye nesi sentíu como entendemos la democracia directa."

¿Podíes desplicanos brevemente qué ye’l proyectu Conceyu Abiertu?

JPEG - 6.8 KB

Somos un movimientu políticu que surde del nacionalismu d’izquierdes, concretamente de la organización Andecha Astur. Básicamente, lo que pretendemos ye que seya un espaciu xunitariu nel que participen persones a títulu individual, non una plataforma d’organizaciones. Quienes formen parte de CA nun son necesariamente militantes d’Andecha Astur, si bien ye cierto que los militantes d’Andecha sí tán formando parte de Conceyu Abiertu. Hai xente que ta n’otros movimientos sociales, n’organizaciones sindicales, ecoloxistes, colectivos xuveniles, o otres organizaciones polítiques incluso. Los principios básicos que defiende CA recuéyense nun manifiestu fundacional y unes bases polítiques del Conceyu Nacional que ficimos el 30 de xunu pasáu, que podemos resumiles en cuatro llínees fundamentales: la democracia participativa, la xusticia social, la defensa del mediu ambiente y la soberanía p’Asturies.
Lo que tamos intentando ye facer un proyectu políticu que dende la base, a través de la participación de la xente afale la democracia participativa dende los conceyos, l’ámbitu fundamental nel que nos queremos mover por ser lo más cercano a los ciudadanos, y ye nesi sentíu como entendemos la democracia directa.
Agora venimos de cellebrar una Coordinadora Nacional ordinaria, abierta a la participación de tola ciudadanía, na que decidimos apostar por afondar na llucha escontra’l fracking o resquiebra hidráulica, qu’agora tien dellos proyectos abiertos n’Asturies, y entamar una campaña en defensa de los conceyos asturianos. Hai tiempu que se vien sintiendo, por parte d’UPyD o mesmamente por CC.OO., la necesidá de fusionar conceyos pa aforrar ente la crisis. A nós pareznos un discursu mui peligrosu, qu’atenta contra la propia esistencia de los municipios asturianos, asina que vamos a arrancar una campaña col lema "Cada conceyu ye importante. Asturies pola democracia participativa".

Esta selmana organizásteis una charra sobre municipalismu indíxena en Méxicu. ¿La meyor manera d’afitar una alternativa política ye entamar polo más cercano, pol conceyu?

Viendo les dificultaes que mos impón el sistema, lo cerráu que ye, lo acutáu que ta l’espaciu políticu, y la cada vez mayor ausencia de democracia colos recortes de llibertaes y derechos que tamos tareciendo, pensamos que dende la base, dende los conceyos, ye la forma más afayadiza de participar en política y construir poder popular. Particularmente n’Asturies los conceyos tienen históricamente esa fuerza y vitalidá democrática que echamos de menos n’otres estayes.

Magar d’esa ausencia de democracia que comentes, CA apuesta por participar nes elleiciones municipales.

Nel Conceyu Nacional de 2012, nel que llantamos les bases polítiques del proyectu, decidimos que la nuestra participación diba ser a nivel municipal, y dexamos la puerta abierta a una posible participación a unos comicios nacionales, que esclararíemos cuando tuviéremos más cerca eses elleiciones. Lo que sí tenemos claro ye que nun mos vamos presentar a elleiciones estatales o europees.

Falando d’esi marcu nacional o autonómicu, parez que treinta años depués, la izquierda nacionaliega poco espoxigó d’aquellos 3000 votos que sacara’l Conceyu Nacionalista Astur nos primeros comicios. ¿Tien xacíu siguir enfotándose nun discursu nacionalista d’izquierdes que parez que nun tien audiencia ente la sociedá asturiana?

Home, yo por supuesto creo que sí. Nun me parez qu’haya que valorar la proyeición del nacionalismu d’izquierdes n’Asturies en clave elleutoral namás, sinon que habría que lo camentar nun ámbitu más ampliu. Ye ciertu, y nun se puede negar, que los resultaes elleutorales siempre fueron probes o anecdóticos, pero a la hora de valorar el pesu del nacionalismu d’izquierda na sociedá asturiana hai qu’atalantar más coses, y creo que los resultaos elleutorales nun faen tola xusticia que debieren. Sí que hubo más avances de los que bramente se pueden ver nunes elleiciones. Afecta la falta de democracia que te dicía enantes; los procesos elleutorales son mui complicaos, con un control total por parte del sistema, mesmamente a través de la llei Elleutoral, de los medios de comunicación que dirixen a la opinión pública y el votu hacia onde-yos interesa. Superar eses torgues pa organizaciones pequeñes y con pocos recursos como nes que militamos munches veces ye percomplicáu. Por embargu, sí consiguimos que la sociedá asuma en parte’l discursu que defendemos los nacionalistes d’izquierdes, anque depués nun se reflexe elleutoralmente. Esi discursu asúmelu bona parte de la sociedá y otres organizaciones con más recursos o presencia, como pueda ser dende la izquierda IU, que d’alguna manera recicla el discursu nacionalista o asturianista. Dende’l centru o la derecha organizaciones como PAS o URAS, o últimamente Foro, consiguen averar a los elleutores a les sos organizaciones con esi discursu asturianu.

Esa ye la siguiente entruga que quería facete: Conceyu Abiertu continúa col discursu nacionalista, antiespañolista davezu, d’Andecha Astur, pero ye evidente que la gran mayoría de la sociedá asturiana nun tien problema n’amestar una clara identidá asturiana, qu’asume como propia, con otra de calter español ensin que-y cree rocea nenguna. Mesmamente tenemos l’exemplu nidiu de Foro, que llegó a ganar, en parte con esi discursu asturianu, les penúltimes elleiciones.

Seguramente hai muncho de cierto no que dices, y analizar agora el porqué la sociedá asturiana asume esa dualidá identitaria diba ser entrar nun alderique mui fondu nel qu’entren en xuegu la herencia del franquismu y la retórica tradicional que xunce Asturies al nacimientu d’España. Pero lo que sí quería afitar sobre esti tema ye que dende CA nun siguimos esi discursu que tu llamabes "antiespañolista". Evidentemente somos soberanistes asturianos y hai independentistes ente nos nuestros militantes, pero sí que me prestaba matizar que defendemos el soberanismu entendíu como democracia, como capacidá de les asturianes y asturianos de decidir por nosotros mesmos, de tomar les nuestres propies decisiones. Pareznos que esi ye’l mensaxe qu’hai que destacar pa llegar a una mayor parte de la sociedá. Nosotros podemos tar a favor de la independencia, pero lo que-y dicimos a la sociedá asturiana ye que nun se mos puede negar el derechu a decidir, a ser los protagonistes de les decisiones que mos afecten como asturianos en tolos ámbitos.

Falabes enantes qu Conceyu Abiertu ye un proyectu xunitariu, sicasí, bona parte de la izquierda soberanista asturiana nun participa de CA, y CA tampoco participa de les otres sigles y proyectos. Na to opinión, ¿qué condiciones nun se dan n’Asturies pa que haya esa xuntanza de toles fuerces que comparten definición como soberanistes y d’izquierdes?

Si lo supiésemos la verdá ye que diba ser abondo más fácil resolver esi problema [rises]. Ye complicao. Hebo diferentes procesos anteriores, delles esperiencies o intentos d’algamar una xunidá elleutoral o una xunidá d’aición. Dende Conceyu Abiertu lo qu’apostamos ye por una xunidá dende la base, aprender primero a trabayar xuntos, a buscar elementos d’alcuentru; a partir d’ehí, trabayando dende esos espacios de coincidencia, cuando se vea posible, empobinar hacia una xunidá elleutoral. Los errores que siempre cometimos ye que cada vez qu’hubo un intentu de xunidá, siempre se planteó en clave elleutoral a pocos meses de los comicios. Y les prises suelen ser males conseyeres. Esperemos que aprendiéramos dalgo d’estos últimos fracasos, y que a la hora de construir la xunidá el procesu seya más lentu, pasu ente pasu, pero que seya con pasu firme. Creo que les organizaciones un poquitín sí que tamos llantando les condiciones pa que se pueda dar más alantre una xunida incluso elleutoral.