L’apocalipsis de les camises Hawaii-Llanes

9 de setiembre de 2013 DE 2013 • Pablo X. Suárez

Beatu de Llébana mola; los sieglos escuros en xeneral. Confieso que nun ye la meyor llectura qu’ún pue facer pa finales d’agostu. Pero tamién veo de frente’l focicu de setiembre, la so bocona abriéndose con inminiencia, llista pa arramplar con neohippies diletantes, romeríes qu’acaben a palos y demás buenrollismos d’a perrona. Asina qu’igual unos comentarios autóctonos al apocalipsis nun son tan mala cosa. ¿Quién diz qu’aquellos sieglos escuros nun fueren más lluminosos qu’esti?¿Que ye que taba l’apocalipsis más cerca entós? De siempre pasó’l milenarismu per nosotros. Qu’entruguen dientro un mes poles camises d’estampáu de palmerines coles qu’acheyeme timó a los modernos-mainstream la presente temporada, poles furgos de los fíos de la clase media qu’apigazarán na cochera hasta la próxima. Ye la tercer guerra mundial que torna regularmente, lo mesmo que furgos y camises hawaii-llanes de verbena y festi van y vuelven. Selo; sí, lo mío ha ser comentar esos pequeños apocalipsis d’a diariu. Coime, y habría inspirame Beatu, por aquello de la tradición llariega y tal. A la mierda Gaspar Melchor. Pero caro, nun tengo en casa nenguna versión del Comentarium. Namás poseo una sospechosa historia del reinu d’Asturies que merqué de saldu cuando peslló Trabe, la cual ocupa un capítulu enteru en comentar lo qu’otros comentaron sobre los comentarios de Beatu al Apocalipsis de Xuan. Llargu, daveres, el viaxe per mar contra l’apocalipsis. Asina que cuando aporfio en que Beatu mola fáigolo básicamente por estética. A la mierda los celtes. L’asturorum regnum. A la mierda’l folk. Take care, Rudy. Al abrir el séptimu sellu, el corderu de san dios tocará la danza l’osu como’l gaiteru principiante, enllenu hasta les oreyes de sidra de lo malo. Esperaremos el fin sintiéndolo de fondu, al par qu’una paisana de cien años milagrosamente viva desafina un romance: un sellu, dos, trés. Pum. Y Beatu mola.

Banda sonora pa esti glayíu: http://www.youtube.com/watch?v=EZC6Ot1MLP0