El llimbu

31 de avientu de 2013 DE 2013 • Beatriz R. Viado

Tuvi viviendo una temporada nel llimbu. De cuando en cuando tovía vuelvo. Non porque me guste especialmente, pero como ando a trompicones, caigo y cuesta salir.
El llimbu ye un sitiu nel que’l tiempo s’estanca, nel que nun hai nin frío nin calor, si acasu una corriente xelada que se fai sitiu nel to cuerpu: nos güeyos y xela les llárimes, nel gargüelu y secuestra les palabres, nos pieses, qu’esfrecen y nun hai doble calcetu que valga. Tamién hai dalguna fola de calor: ráfagues de lluz del pasáu, destellos del futuru. Sicasí, lo normal ye una rutina gris, fea, cansada y anodina.
Tando yo en tan peculiar y non buscáu destín, sentíame desgraciada. Pero dábame vergoña llamentame más de la cuenta. Vía les traxedies nes noticies, el nun saber si mañana habrá dalgo pa xintar, o si’l corazón camudará en piedra albentestate. Y claro, yo, que soi una privilexada, que tengo un techu, avezo a comer tolos díes y que tengo con quien desfogar cuando la neura amenaza la ntegridá psíquica , pos nun me parecía plan andar lloramicando pol circunstancial vaciu de la mio existencia.
Hasta que descubrí ónde taba: nel llimbu, esi sitiu ensinsustancia, ensin fin y ensin confín. L’otro ye l’infiernu. Onde’l mal y la desgracia campen a caprichu. Ye la comparanza relixosa que se m’ocurrió, que ye de lo meyor que pue dar una relixón: bones figures lliteraries. El casu ye que pone-y nome al llugar ayudóme a salir d’él. Porque’l problema ye confundir el llimbu cola vida, dalgo qu’asocede munches veces.
Trabayar, reponer fuerza de trabayu, trabayar, reponer fuerza de trabayu, trabayar, reponer fuerza de trabayu… (sí, sí, toi nun sitiu nel que se trabaya, non en tierres ibériques, esi ye otru cantar). Asina hasta que quieras o muerras. Lleía va poco qu’ún de los motivos pa que desapaeciera la esclavitú foi que na Revolución Industrial diéronse cuenta de que yera muncho más efectivo tener xente asalariao que mano d’obra esclavo. Val qu’había que paga-yos una miseria pa que se mantuvieren con vida, pero la inversión pagaba la pena: nun había que contratar capataces nin vixilante pa que les mases/manes proletaries nun escaparen y ocupábense personalmente de les xeres reproductives (la casa y el llantar, caxigalines de probes). Y sin cadenes. Y a tiempo completu. Bona inversión lo del salariu basura. Hasta revierte en propaganda barata no tocante al cumplimientu de los derechos humanos.
Nel llimbu nel que dacuando caigo tengo un contratu cuasi calcáu al qu’acaba de llegalizar el partíu de la gaviota (¿será en realidá una utre de mal dibuxante?). Eso de flexibilizar el contratu a tiempu parcial. Yo tengo ún d’esos. Reconozo que nun lu lleí mui atentamente cuando lu firmé. Mira a ver si piensen que soi una intelectual y, amás, diba a firmalu de toes toes: necesitaba’l trabayu y tampoco nun van regalándolos pela cai.
Lleílu tiempu después, cavilando si eso sería llegal. Y sí, ye llegal. Unes selmanes trabayo venti hores y otres cincuenta y cuatro. Según necesidades de la producción. Tienes un día de descansu, otru cantar ye que sepias cuando. Al final de la semana pónente l’horariu de la siguiente y asina, oi, puedes planificar a siete días vista. Dacuando trabayes en turnu de tarde, dacuando de mañana, y dacuando de catorce hores. A veces viente un capataz (supervisor o manager n’english) y coméntate, a media hora de terminar la to xornada de siete o ocho hores, que si te da más quedate siete horines más (¡hala! Non una, nin dos. Son la monda lironda). Y toes al mesmu preciu, nada d’hores estres. Los domingos y los festivos mándense de la mesma política. Nel reinu d’España eses hores van llamase “complementaries”. El mio contratu, tres folios de lletra pequeño, ta enllenu de cláusules que se resumen mui bien nuna sola: la empresa pue disponer como-y dea la santísima gana del tiempu (tou) de l’asalariada.
Too esto dificulta enforma conciliar el trabayu con absolutamente nada. Col estudiu, cola vida social o con esparder. Si yes inmigrante la cosa nun ye tan grave: la to vida reduzse a intervalos ente visites o a proyecciones d’un futuru meyor, polo que yes perflexible. Nun te da más trabayar en Navidá (bono, sí te da, pero non muncho), en festivos o llegar a les tantes a casa. Yes el chollu de los chollos. Y too por contratu.
Hai que reconocer que la compañía ta percontenta. La mui desgraciada, nun inxenuu y insultante xestu de facete partícipe de la so prosperidá, ufiértate información diciéndote la montonera de beneficios qu’atropa gracies a la to flexibilidá y salariu mínimu. Rentable será, nun digo yo que non. Otra cosa ye que sía compatible cola vida humana.