La mocedá independentista y revolucionaria d’Asturies celebra otru 26 de Xunetu de Revolución en Cuba.

Como ye vezu, güei salimos a la cai a festexar l’aniversariu del asaltu al cuartel Moncada, símbolu del trunfu de la revolución socialista nel hermanu país caribeñu.

Pa Darréu, como pa cualisquier revolucionaria del mundu, Cuba ye un exemplu almirable en tolos sentíos y asina queremos manifestalo especialmente nesta fecha:



- Cuba ye un país socialista qu’en plenu sieglu XXI llucha y apuesta por una sociedá xusta y igualitaria onde nun exista la esplotación ente seres humanos, onde se garantice la plena igualdá ente les persones, pa noxu y desesperación del capitalismu y los sos órganos de poder mundiales que criminalmente aisllen y reprimen al pueblu cubanu dende va cuarenta años torgando la so llibertá pa desendolcase col xabaz bloquéu comercial a la islla. Ensin dubia una esperiencia de participación popular y arguyu coleutivu como’l cubanu, que ye capaz de dir articulando soluciones a los sos problemes, siempres dende una perspectiva socialista, ye una amenaza a la puerta mesma del gran imperiu al afitar la esistencia d’alternatives al capitalismu xenocida.

- Cuba ye exemplu del internacionalismu, de la solidaridá fraternal proletaria, la ternura d’un pueblu que pese a les sos carencies impuestes pol gobiernu mundial, lleva décades repartiendo ayuda de tou tipu a otros países y pueblos que reclamen el so sofitu a diferencia del colonialismu y despreciu pola vida humana qu’asoleyen los gobiernos de les potencies occidentales.

- Cuba ye construcción nacional, l’exemplu de tou un pueblu, una nación que supo llevantase escontra la opresión. La fase d’emancipación y construición nacional que supusieron los procesos revolucionarios cubanos, primero escontra España y depués de los EE.XX. ye l’exemplu pa tolos independentistes del mundiu qu’entendemos que xuncir lliberación social y nacional ye la única vía posible p’algamar la llibertá real de les naciones oprimíes del mundiu. Nun pue dase una lliberación nacional si nun se ruempen les atadures económiques qu’afiten el dominiu efeutivu sobre esi territoriu.

Poro, por compartir estos tres pegoyos fundamentales, Darréu - mocedá independentista revolucionario – quier festexar xuntu al pueblu Cubanu otru añu más de resistencia, de llucha, de lliberación nacional y construcción del socialismu. Del arguyu como pueblu y como clase social. Darréu ve en Cuba un faru qu’alluma’l camín pel que siguir yonde deprender, porque como dixo Ernesto Guevara “los pueblos tienen que lliberase ellos mesmos” y equí n’Asturies cada día somos más xente que dicimos basta a al esfarrape social y cultural de la nuesa nación. Ente toos y toes tamos faciendo camín pa reivindicar los drechos que-y correspuenden a tou pueblu, algamar l’autodetermín pa escoyer que modelu políticu y económicu queremos que gobierne les nueses vides y exemplos como’l cubanu animen a siguir alantre: la victoria ye la única opción pal pueblu.

PUXA ASTURIES LLIBRE Y SOCIALISTA!

PUXA CUBA LLIBRE Y SOCIALISTA!

PATRIA O MUERTE!