Bono, pa entamar, podríeis comentanos un poco la hestoria de Skama
la rede? ¿Cuándu ñaz? ¿Quienes lu formen?

Falando de memoria, el primer ensayu debimos facelu en setiembre o ochobre del 2003. Axuntámonos nel proyectu una serie de persones, dalgunes d'elles nin nos conocíemos, que queríemos facer daqué estremao nel panorama musical asturianu. Lletres n'asturianu con temática social y el ska como soníu referencial foron les premises que punximos enriba la mesa.

El grupu formámoslu Míguel (Voz), Edu (Guitarra), Xuárez (Baxu), Llou (Batería), Sergio (Teclaos), Kike (Gaita) y Jose (Trompeta). Somos los mesmos dende'l principiu quitando a Xuárez que s'incorporó al poco d'entamar sustituyendo a Mox que tuvo que dexar el grupu por incompatibilidá d'horarios col so trabayu.

Recién sacao esti nueu trabayu, “Echaos a la mar” ¿qué podemos topar n'él?

Son doce cantares que siguen la llinia que venimos marcando dende "Hestories absurdes" y "La nuesa hestoria". Quiciaves les lletres seyan un poco menos "macarres" y les músiques tengan mas arreglos. Nun foi una cosa buscada, siempre dicimos que facemos cantares, que nun facemos discos. Coincidió que lo que compusimos estos dos años foi asina, veremos nel futuru pero onde van los siguientes tiros.

¿Qué tal acoyida ta teniéndo esti discu?
Ye ceo pa sabelo a nivel de ventes. Agora bien, nel día día, nel falar cola xente vemos que-yos presta.

¿Usáis la música como un mediu pa facer llegar un mensax? ¿Qué tipo de mensax quereis facer llegar?

Nun queremos moralizar nin adoctrinar, namás nos pruye cantar lo que sentimos. Esi ye'l nuestru oxetivu, agora, ye verdá si les nuestres canciones valen pa espertar dalguna conciencia meyor que meyor.

¿Cómo véis el panorama musical de la nuesa tierra anguaño?

Buf! Creo que nunca hebo tantos grupos y con tanta calidá y al mesmu tiempu tantes dificultaes pa poder tocar en directo, sobremanera la xente que ta entamando. D'otru llau, deberíemos sacar conclusiones de porque nos cuesta tanto "vender" la nuestra música fuera y porque hai ciertu estancamientu en dalgunos estilos.

¿Qué opináis d'un tema tan de moda, que tanto afecta a los músicos, como ye la piratería, el top manta y la SGAE? ¿Creéis que esto pue afectavos?

Vamos ver, a nosotros nun nos paez bien que naide saque perres a costa del nuestru trabayu, por eso creemos qu'hai qu'actuar contra les mafies, pero enxamás contra l'inmigrante que vien a ganase la vida n'Asturies y que vende cd's pirates como podría vender botelles de sidra.

El tema de la SGAE ye complicao. Tienen un negociu montáu alredor de la música del cual nun compartimos la mayoría de les coses.

¿Dalguna presentación o conciertu pa feches cercanes?

Pa finales de mes nel Festival Derrame Rock. En xunetu nun vamos actuar por cuestiones personales de dalgún miembru del grupu pero p'Agostu yá hai unes cuantes feches terminaes.

Si queréis decir daqué más...

Davos les gracies por dexanos un sitiu pa esplayanos nel vuestru mediu y felicidaes por mantenenos informaos tolos díes sobre aquelles noticies que "nun tienen sitiu" nos medios de desinformación.